"बाढ़- तू हमरा किहाँ काहे ना आवेलू !"

इ एगो अइसन सवाल रहे जवन हम हर साल बाढ़ से पूछी अपनी लइकाई में। लइकाई के उमिर, ओ समय तक इ बुद्धि ना विकसित भईल रहे की हम ओकर लाभ हानि के आकलन क सकी। हमरा अउरी हमरा टोली के लइका कुल के बाढ़ के माने बस इहे रहे कि खायींची भर के ख़ुशी अउरी स्कूल से छुट्टी। कबो कबो बरखा के दिन में हमरा स्कूल के अहाता में ठेहुना भर पानी लाग जाओ। नारियल के सूखल लकड़ी पड़ल रहे। फेरु स्कूल के लईका कुल एगो छोट लकड़ी लेके नारियल के लकड़ी पर खड़ा हो जा सं अउरी उ लकड़ी हमनी के डेंगी बन जाऊ। ओके लेके हमनी के चारू ओर घूमी जा पानी में अउरी खूब माजा आवे। एहि से हमनी के लागे कि जहवाँ बाढ़ आवत होइ ओइजा के लईका कुल के खूब आनंद आवत होई। वइसे त हमनी के गांव भी अन्य गांव जइसन ही रहे लेकिन नदी गंडक से करीब २० किलो मीटर दूर भईला से हमनी किहाँ कबो बाढ़ ना आवे। गांव भी उचास पर रहे त पानी भी लागे। बरखा के दिन में जब भी इ सुनाऊ की फलाना गांव में बाढ़ आयिल बा त अपना गांव में जनम लेहला के बड़ा अफ़सोस होखे। मन में कचोट उठे की हम काहे ना ओहि गांव में पैदा भईनी।